जम्मू-काश्मीर, हरियाणात १८, २५ सप्टेंबर, १ ऑक्टोबर अशा तीन टप्प्यात निवडणूक
– कलम ३७० हटवल्यानंतर पहिल्यांदाच होणार निवडणूक,
नवी दिल्ली, (१६ ऑगस्ट) – निवडणूक आयोगाने जम्मू आणि काश्मीर तसेच हरियाणा विधानसभा निवडणूकांचा कार्यक्रम आज शुक्रवारी जाहीर केला. २०१९ साली कलम ३७० हटवल्यानंतर जम्मू आणि काश्मीर या केंद्रशासित प्रदेशात ही पहिल्यांदाच निवडणूक होणार आहे. निवडणूक आयोगाचे मुख्य निवडणूक आयुक्त राजीव कुमार यांनी ही घोषणा केली. त्यानुसार, १८, २५ सप्टेंबर आणि १ ऑक्टोबर अशा तीन टप्प्यात निवडणूक होणार आहे. तर ४ ऑक्टोबरला निकाल असणार आहे.
निवडणुका व्हाव्यात अशी लोकांची इच्छा आहे – राजीव कुमार
आम्ही अलीकडेच जम्मू-काश्मीर आणि हरियाणा या राज्यांना विधानसभा निवडणुकीच्या तयारीचा आढावा घेण्यासाठी भेट दिली. यावेळी लोकांमध्ये निवडणुकांसाठी मोठा उत्साह दिसून आला. त्यांना निवडणूक प्रक्रियेत सहभागी व्हायचं आहे. लोकांची निवडणुका व्हाव्यात अशी इच्छा आहे. तिथं शक्य तितक्या लवकर निवडणुका आयोजित करु असं आश्वासन आम्ही दिलं. लोकसभा निवडणुकीच्या वेळी जम्मू-काश्मीरमधील मतदान केंद्रावर लागलेल्या लांबलचक रांगा हा पुरावा आहे की, लोकांना केवळ बदलच नव्हे तर त्या बदलाचा एक भाग बनून आवाजही उठवायचा आहे असे मुख्य निवडणूक आयुक्त राजीव कुमार म्हणाले.
जम्मू आणि काश्मीरमध्ये एकूण ९० विधानसभा मतदारसंघ आहेत. त्यांपैकी ७४ सर्वसाधारण, एससी-७ आणि एसटी-९ आहेत. जम्मू-काश्मीरमध्ये एकूण ८७.०९ लाख मतदार आहेत. ज्यामध्ये ४४.४६ लाख पुरुष, ४२.६२ लाख महिला, ३.७१ लाख प्रथमच मतदार आणि २०.७ लाख तरुण मतदार आहेत.
हरियाणामध्ये ९० विधानसभा मतदार संघ आहेत. इथे एकूण २.०१ कोटी मतदार आहेत. हरियाणात २०,६२९ मतदान केंद्र असतील. प्रत्येक मतदार केंद्रावर सगळ्या सुविधा आयोगाकडून पोहोचवल्या जातील. इथे ८५ पेक्षा जास्त वय असलेल्या मतदारांचं मतदान घरी जाऊन घेण्यात येणार आहे.
हरियाणा आणि जम्मू काश्मीर पाठोपाठ आता महाराष्ट्रातील निवडणुकांकडेही देशाचं लक्ष लागलेलं आहे. या निवडणुकांबाबत सोशल मीडियावर एक मेसेज व्हायरल होत आहे. या मेसेजमुळे अनेकांचा गैरसमज होत असल्याने हा मेसेज खरा की खोटा? याचा खुलासा निवडणूक आयोगाने केला आहे.
महाराष्ट्रातील निवडणुकांच्या तारखा अद्याप जाहीर केलेल्या नाहीत – आयोगाचे स्पष्टीकरण
निवडणूक आयोगाने एक्स वर पोस्ट करत या व्हायरल मेसेजबाबत माहिती दिली आहे. एका वृत्तवाहिनीचा स्क्रीनशॉट तयार करुन त्यामध्ये महाराष्ट्र आणि हरियाणातील विधानसभा निवडणुकांच्या तारखा जाहीर झाल्याचे म्हटले आहे. पण हे खोटे असून अद्याप निवडणूक आयोगाने अधिकृतरित्या या तारखा जाहीर केलेल्या नाहीत. योग्य वेळ आल्यानंतर या निवडणुकांच्या तारखा पत्रकार परिषद घेऊन जाहीर करण्यात येतील, असे निवडणूक आयोगाने स्पष्ट केले आहे.
Posted by - Admin,
कोणत्याही टिप्पण्‍या नाहीत:
टिप्पणी पोस्ट करा