मुंबई, ७ ऑक्टोबर - राज्यात यंदा खरीप हंगामात झालेल्या अतिवृष्टी आणि पूर परिस्थितीमुळे नुकसान झालेल्या शेतकऱ्यांसाठी महाराष्ट्र सरकारने मोठे मदतीचे पॅकेज जाहीर केले आहे. मुख्यमंत्री देवेंद्र फडणवीस यांनी दोन्ही उपमुख्यमंत्री एकनाथ शिंदे आणि अजित पवार यांच्या समवेत आयोजित पत्रकार परिषदेत अतिवृष्टीग्रस्तांसाठी एकूण 31,628 रुपये कोटींचे पॅकेज जाहीर केले. शेतकऱ्यांच्या खात्यावर दिवाळीपूर्वी मदत जमा करण्याचा सरकारचा आग्रह असल्याचे मुख्यमंत्री फडणवीस यांनी यावेळी सांगितले.

या ऐतिहासिक पॅकेजमध्ये पीक नुकसान, जमिनीची धूप, घर आणि जनावरांचे नुकसान, तसेच पायाभूत सुविधांच्या पुनर्बांधणीसाठी भरीव मदत समाविष्ट आहे.

प्रमुख मदतीची घोषणा आणि तपशील

मुख्यमंत्री फडणवीस यांनी राज्यातील भीषण परिस्थिती, झालेले जीव आणि मालमत्तेचे नुकसान, तसेच शेतकरी आणि शेतीच्या नुकसानीची माहिती दिली. राज्यातील 1 कोटी 43 लाख 52 हजार 141 हेक्टर क्षेत्रावर असलेल्या शेतीचे मोठे नुकसान झाले आहे, यापैकी 29 तालुक्यांमध्ये सर्वाधिक फटका बसला आहे.

पीक आणि जमीन नुकसानीसाठी थेट मदत

मदतीचा प्रकार                                                           प्रति हेक्टरी रक्कम (₹)

खरडून गेलेल्या जमिनीसाठी (रोख)                                       47,000

खरडून गेलेल्या जमिनीसाठी (मनरेगा माध्यमातून)                    3,00,000

एकूण (खरडून गेलेल्या जमिनीसाठी)                                      3,47,000

हंगामी बागायती शेतीसाठी                                                   27,000

बागायती शेतीसाठी                                                                32,500

रब्बी पीक घेता यावे यासाठी (प्रति हेक्टर)                                  10,000

विमा उतरवलेल्या शेतकऱ्यांना (विमा व्यतिरिक्त)                        17,000

कोरडवाहू शेतीसाठी                                                           35,000

विमा उतरवलेल्या बागायती शेतीला                                     50,000 हून अधिक

शेतकऱ्यांना पीक नुकसान भरपाई म्हणून 65 लाख हेक्टर साठी 10,000 कोटी रुपये आणि इतर बाबींसाठी 27,000 रुपये ते 32,500 रुपयापर्यंतची मदत जाहीर करण्यात आली आहे. ओला दुष्काळामधील सर्व निकषांवर ही मदत दिली जाणार असल्याचे मुख्यमंत्र्यांनी स्पष्ट केले.

जनावरे: दुधाळ जनावरांच्या मृत्यूसाठी 37,000 रुपयांपर्यंत मदत.कुक्कुटपालन: प्रति कोंबडी 100 रुपये मदत.विहिरी: गाळ भरलेल्या विहिरींच्या नुकसानीसाठी प्रति विहीर 30,000 रुपयांची मदत.घरे: पूर्णपणे नष्ट झालेली/पडझड झालेली घरे नव्याने बांधण्यासाठी मदत दिली जाणार आहे.डोंगरी भागातील नागरिकांना नवीन घरांसाठी 10,000 रुपये अधिकची मदत.इतर: दुकानदार, झोपडीधारक आणि गोठ्यांच्या नुकसानीसाठी 50,000 रुपयापर्यंतची मदत.विद्यार्थी: पूरग्रस्त भागातील विद्यार्थ्यांना परीक्षा शुल्कातून सूट दिली जाईल.पायाभूत सुविधा: रस्ते, पूल आणि इतर पायाभूत सुविधांच्या भरपाईसाठी यापूर्वी 10,000 कोटी रुपये देण्यात आले असून, आता आणखी 15,000 कोटी रुपये देण्यात येणार आहेत. 

मुख्यमंत्री फडणवीस यांनी यावेळी सांगितलं की, भीषण परिस्थितीत सुरुवातीलाच तातडीची मदत म्हणून प्रत्येक बाधित कुटुंबाला 10,000 रुपये रोख आणि अन्नधान्य वाटप करण्यात आले. यासाठी राज्य सरकारने सुरुवातीला 22 कोटी रुपये खर्च करून तातडीची मदत पोहोचवली. या पॅकेजमुळे आर्थिक आणि मानसिक त्रासात असलेल्या शेतकऱ्यांना मदत मिळेल आणि ते पुन्हा शेती उभी करू शकतील, अशी अपेक्षा सरकारने व्यक्त केली आहे.

मुंबई, ७ ऑक्टोबर - मुंबईच्या वाहतूक इतिहासातील सर्वात मोठा आणि महत्त्वाकांक्षी प्रकल्प असलेल्या मुंबई मेट्रो मार्गिका 3 च्या अंतिम टप्प्याचे उद्घाटन बुधवारी होणार आहे. या महत्त्वपूर्ण टप्प्यामुळे मुंबईतील पहिली संपूर्ण भूमिगत मेट्रो मार्गिका पूर्ण होणार आहे. पंतप्रधान नरेंद्र मोदी यांच्या हस्ते आचार्य अत्रे चौक (वरळी) ते कफ परेड या अंतिम आणि अत्यंत महत्त्वाच्या पट्ट्याचे उद्घाटन होणार आहे, ज्यामुळे मुंबईकरांच्या प्रवासाचा वेळ कमालीचा कमी होणार आहे.

मुंबईची 'पहिली भूमिगत' मेट्रो

हा मेट्रो मार्ग एकूण 33.5 किलोमीटर लांबीचा असून, आरे कॉलनी (उत्तर) ते कफ परेड (दक्षिण) यांना जोडतो. हा मुंबईतील पहिला संपूर्ण भूमिगत मेट्रो मार्ग आहे, ज्यामुळे शहराच्या दक्षिणेकडील व्यावसायिक केंद्रे पश्चिम आणि मध्य उपनगरांशी थेट जोडली जातील.

या मार्गावर एकूण 27 स्टेशन्स आहेत. आरे डेपो वगळता सर्वच्या सर्व स्टेशन्स भूमिगत (Underground) आहेत. रस्त्याने आरे ते कफ परेड हे अंतर पार करण्यासाठी सामान्यतः 2 तासांहून अधिक वेळ लागतो, मात्र आता मेट्रो-3 मुळे हा प्रवास अवघ्या 54 मिनिटांत पूर्ण करणे शक्य होणार आहे.

या 11 स्टेशन्सचे होणार उद्घाटन

बुधवारी म्हणजेत 8 ऑक्टोबर रोजी आचार्य अत्रे चौक (वरळी) ते कफ परेड या अत्यंत महत्त्वाच्या टप्प्यावरील खालील 11 स्टेशन्स प्रवाशांसाठी खुली केली जाणार आहेत. या स्टेशन्सची मराठी आणि इंग्रजी नावे खालीलप्रमाणे:

विज्ञान संग्रहालय, महालक्ष्मी, जगन्नाथ शंकरशेट, ग्रँट रोड, गिरगाव, काळबादेवी, छत्रपती शिवाजी महाराज टर्मिनस, हुतात्मा चौक, चर्चगेट, विधान भवन, कफ परेड.

संपूर्ण 'अ‍ॅक्वा लाइन' वरील स्टेशन्सची नावे (आरे ते कफ परेड)

आरे JVLR, सीप्ज, अंधेरी MIDC, मरोळ नाका, CSMIA टी2, सहारा रोड, CSMIA टी1, सांताक्रूझ, वांद्रे कॉलनी, बीकेसी, धारावी, शीतलादेवी मंदिर, दादर मेट्रो, सिद्धिविनायक मंदिर, वरळी, आचार्य अत्रे चौक, विज्ञान संग्रहालय, महालक्ष्मी, मुंबई सेंट्रल, ग्रँट रोड, गिरगांव, काळबादेवी, सीएसएमटी, हुतात्मा चौक, चर्चगेट, विधान भवन, कफ परेड.

इतर वाहतूक मार्गांशी थेट कनेक्टिव्हिटी

या मेट्रो मार्गिकेमुळे मुंबईच्या सध्याच्या वाहतूक जाळ्याशी थेट जोडणी साधली जाणार आहे.

उपनगरीय रेल्वे: मुंबई सेंट्रल, सीएसएमटी आणि चर्चगेट येथे उपनगरीय रेल्वेशी इंटरचेंज उपलब्ध असेल.

मेट्रो लाइन 1: मरोळ नाका येथे मेट्रो मार्गिका 1 (घाटकोपर-वर्सोवा) शी जोडणी.

विमानतळ: देशांतर्गत (T1) आणि आंतरराष्ट्रीय (T2) विमानतळांना थेट कनेक्टिव्हिटी.

तिकीट दर

मुंबई मेट्रो 3 मध्ये अंतरावर आधारित तिकीट दर रचना लागू करण्यात आली आहे, ज्यामुळे सर्व प्रवाशांना परवडणारे भाडे निश्चित करण्यात आले आहे.प्रवाशांना 3 किमी पर्यंतच्या अंतरासाठी 10 रुपये मोजावे लागतील. ज्या प्रवासाचे अंतर 3 ते 12 किमी दरम्यान असेल, त्यांना 20  रुपये  शुल्क आकारले जाईल, तर 12 ते 18 किमीच्या मध्यम-अंतरासाठी  30  रुपये  तिकीट असेल. त्याहून अधिक, 18 ते 24 किमी दरम्यान प्रवास करणाऱ्या प्रवाशांना  40  रुपये  आणि 24 ते 30 किमीसाठी  50  रुपये  भरावे लागतील.  30 ते 36 किमीच्या प्रवासासाठी तिकीट 60  रुपये  दर निश्चित करण्यात आला आहे.  तुम्ही तिकीट दर https://mmrcl.com/en/fare-recharge या अधिकृत वेबसाईटला चेक करु शकता. 

प्रमुख स्टेशनसाठी लागणारा तिकीट दर

आचार्य अत्रे चौक ते कफ परेड: 40 रुपये

आरे JVLR ते कफ परेड:  70 रुपये

आरे JVLR ते सिद्धिविनायक: 60 रुपये

दादर मेट्रो ते चर्चगेट मेट्रो:  50 रुपये

या मार्गावर दररोज 17 लाखाहून अधिक प्रवासी प्रवास करतील असा अंदाज आहे. त्यामुळे मुंबईच्या वाहतूक व्यवस्थेवरील ताण कमी होऊन आर्थिक राजधानीच्या दळणवळणाची व्याख्या नव्याने निश्चित होण्यास मदत होईल.

मोदींच्या मुंबई दौऱ्यापूर्वी मोठं गिफ्ट!

 2 रेल्वे प्रकल्पांमुळे विदर्भ ते खानदेश प्रवास होणार सुपरफास्ट

भारतीय रेल्वे नेटवर्कच्या विस्तारासाठी केंद्र सरकारने मंजूर केलेल्या 24,634 कोटी रुपयांच्या चार महत्त्वाकांक्षी प्रकल्पांमध्ये, महाराष्ट्रातील दोन मोठ्या मार्गांचा समावेश आहे. केंद्रीय मंत्रिमंडळाच्या आज (7 ऑक्टोबर 2025) रोजी झालेल्या बैठकीत या निर्णयावर शिक्कामोर्तब करण्यात आलंय.  विशेष म्हणजे, पंतप्रधान नरेंद्र मोदी यांच्या 8 आणि 9 ऑक्टोबर 2025 रोजी होणाऱ्या मुंबई दौऱ्याच्या अगदी तोंडावर राज्याला हे 'गिफ्ट' मिळाल्याने कोकण, विदर्भ आणि खानदेशातील रेल्वे कनेक्टिव्हिटीला नवा आयाम मिळणार आहे.

या सर्व प्रकल्पांची एकूण किंमत 24,634 कोटी रुपये असून, 894 किलोमीटर लांबीच्या नव्या लाईन्स 2030-31 पर्यंत पूर्ण करण्याचे उद्दिष्ट आहे. यामुळे 85 लाखांहून अधिक लोकांना थेट फायदा होईल, अशी माहिती रेल्वेमंत्री अश्विनी वैष्णव यांनी दिली.

महाराष्ट्रासाठी महत्त्वाचे दोन प्रकल्प (398 किमी)

महाराष्ट्रातील रेल्वे क्षमता वाढवण्यासाठी दोन महत्त्वपूर्ण मार्गांना मंजुरी मिळाली आहे.

महत्त्व: विदर्भ आणि खानदेशाला जोडणारा हा महत्त्वाचा मार्ग आहे. भुसावळ हे मोठे रेल्वे जंक्शन असल्याने, या मार्गामुळे मुंबई-कोलकाता (हावडा) मुख्य मार्गावरील वाहतुकीची गर्दी कमी होण्यास मदत होईल. हा मार्ग पूर्ण झाल्यास मालवाहतूक आणि प्रवासी गाड्यांची गती वाढेल, ज्यामुळे कोकणातून विदर्भ किंवा मध्य भारताकडे होणारी वाहतूक अधिक वेगवान होईल.

गोंदिया-डोंगरगड चौथी लाईन (84 किमी):

महत्त्व: हा मार्ग महाराष्ट्रातील गोंदिया जिल्ह्याला छत्तीसगडच्या राजनांदगाव जिल्ह्याशी जोडतो. हा अत्यंत महत्त्वाचा कोळसा वाहतूक मार्ग असल्याने, चौथी लाईन झाल्यावर औद्योगिक मालवाहतुकीत प्रचंड वाढ होईल. गोंदिया-डोंगरगड मार्गाचा फायदा मध्य प्रदेश, छत्तीसगडसह विदर्भातील अनेक भागांना होणार आहे.

85 लाखांहून जास्त लोकांना प्रत्यक्ष लाभ

पंतप्रधानांच्या अध्यक्षतेखालील मंत्रिमंडळाच्या बैठकीनंतर रेल्वेमंत्री अश्विनी वैष्णव यांनी सांगितले की, या चारही प्रकल्पांमुळे सुमारे 3,633 गावांमधील 85 लाखांहून अधिक लोकांना रोजगार आणि स्वयंरोजगाराचे नवीन मार्ग खुले होतील.

या नवीन लाईन्समुळे रेल्वे मार्गावरील ट्रेनची गर्दी कमी होईल. गाड्यांची गती वाढेल आणि वेळेवर धावण्याची क्षमता सुधारेल, ज्यामुळे प्रवाशांना मोठा दिलासा मिळेल. त्याचबरोबर लॉजिस्टिक कार्यक्षमतेत सुधारणा झाल्यामुळे दरवर्षी 780 लाख टन (78 Million Tonnes) अतिरिक्त मालवाहतूक करणे शक्य होणार आहे.

पर्यावरणाचे मोठे संरक्षण

हा प्रकल्प ऊर्जा-कार्यक्षम आणि पर्यावरणाला अनुकूल असा आहे. या वाहतूक सुधारणांमुळे वातावरणातील 139 कोटी किलोग्राम कार्बन उत्सर्जन घटेल. पर्यावरणाचा हा फायदा सुमारे 6 कोटी (60 Million) झाडे लावल्याच्या बरोबरीचा आहे.

पंतप्रधान 'पीएम-गती शक्ती राष्ट्रीय मास्टर प्लॅन' च्या माध्यमातून मल्टी-मॉडेल कनेक्टिव्हिटी वाढवण्यावर भर देत आहेत आणि हा निर्णय त्याच दिशेने उचललेले एक मोठे पाऊल आहे.

विमानतळाची पहिली धावपट्टी पूर्णपणे तयार आहे, तर दुसरी धावपट्टी पुढील चार वर्षांत पूर्ण होईल. दोन्ही धावपट्टीवर स्वतंत्र टॅक्सीवे आणि ३५० विमानांसाठी पार्किंगची जागा असेल. कनेक्टिव्हिटी सुधारण्यासाठी, अटल सेतू ते कोस्टल रोडपर्यंत एक नवीन रस्ता बांधला जात आहे आणि मेट्रो लाईन ८ लवकरच मंजूर होण्याची अपेक्षा आहे. वॉटर टॅक्सी सेवा देखील सुरू केली जाईल.

विमानतळाच्या बांधकामादरम्यान पर्यावरण संरक्षणाकडे विशेष लक्ष देण्यात आले. विमानतळ हरित ऊर्जा आणि जलसंवर्धन उपायांनी सुसज्ज आहे. टर्मिनल डिजिटल कलाद्वारे भारतीय संस्कृती प्रतिबिंबित करेल, तर ऑपरेशनमध्ये कृत्रिम बुद्धिमत्ता (एआय) वापरली जाईल.

या प्रकल्पाचा एकूण खर्च ₹१९,६०० कोटी आहे. सिडकोने जमीन विकासासाठी ₹३,५०० कोटींची गुंतवणूक केली आहे. या विमानतळामुळे मुंबई महानगर प्रदेशाची हवाई वाहतूक क्षमता दुप्पट होईल.

अदानी समूहाचे अध्यक्ष गौतम अदानी यांनी हे विमानतळ बांधणाऱ्या सर्वांना समर्पित केले. त्यांचे पुत्र जीत अदानी म्हणाले की, हे बांधकाम केवळ काँक्रीटचे नाही तर कठोर परिश्रमाचे आहे. गौतम अदानी यांनीही हीच भावना व्यक्त केली आणि म्हटले की, ते बांधणारा प्रत्येक हात आणि ते जपणारे प्रत्येक हृदय हे या विमानतळाचे खरे शिल्पकार आहेत.

वर्धा, ४ ऑक्टोबर - महिला प्रत्येक क्षेत्रात पुढे आहेत. स्त्रीला काही देवदत्त वरदान आहेत. त्यामुळे त्या श्रेष्ठ आहेत. मातृत्वभाव ठेवत त्या प्रत्येक क्षेत्रात पुढे आहेत. माधवी लता यांच्या कर्तव्याचा उल्लेख करीत ऑपरेशन सिंदुरमध्येही दोन महिलांची भुमिका महत्त्चपूर्ण होती. मातृत्वभाव जागृत ठेवणे आवश्यक आहे. मुलांना जन्म देऊन होणार नाही तर त्यांच्यावर चांगले संस्कार करण्याची जबाबदारीही तुमचीच असल्याचे मार्गदर्शन राष्ट्र सेविका समितीच्या प्रमुख संचालिका वी. शांताक्का यांनी केले.

वर्धा नगर राष्ट्र सेविका समितीच्या वतीने आज शनिवार ४ रोजी स्थानिक रंजन सभागृह येथे आयोजित शस्त्रपूजन व विजयादशमी उत्सवात त्या प्रमुख उद्बोधन करताना बोलत होत्या. यावेळी प्रमुख अतिथी म्हणून दत्ता मेघे उच्च शिक्षा आणि अनुसंधान संस्था सावंगी येथील कुलसचिव डॉ. श्वेता काळे (पिसुळकर) उपस्थित होत्या तर व्यासपिठावर प्रांत कार्यवाहिका रोहिणी आठवले, नगर कार्यवाहिका अ‍ॅड. सुवर्णा काळे यांची उपस्थिती होती.

त्या पुढे म्हणाल्या की, सज्जन शक्ती संघटीत करून राष्ट्रसर्वतोपरी ही भावना निर्माण करण्यासाठी डॉ. हेडगेवार यांनी राष्ट्रीय स्वयंसेवक संघाची स्थापना केली. स्वत: एमबीबीएस डॉक्टर असताना त्यांनी स्वत:चे जीवन राष्ट्राला समर्पित केले. त्यांनी स्वत:च्या नव्हे तर राष्ट्राच्या आरोग्याची काळजी घेतली. व्यक्ती ते राष्ट्रनिर्माण असे अलौकीक कार्य १ तासाच्या संघ शाखेतून सहज होत असल्याचे त्या म्हणाल्या. कर्मठ स्वयंसेवक निर्माण झाले आहेत. स्वयंसेवकांचे कार्य निरंतर सुरू आहे. जिथे कमी तिथे स्वयंसेवक असल्याचे त्या म्हणाल्या. सर्व युद्धात प्रत्यक्ष रणभुमीत नव्हे पण सैनिकांना मदतकार्य केले. समाजात सकारात्मक बदल करण्यासाठी पंच परिवर्तनाची गरज त्यांनी व्यक्त केली.

भारताचे लक्ष जीवन दर्शनला बदलायचे आहे. विश्व कल्याणासोबतच आमचा भारत सशक्त होईल. पर्यावरण संरक्षण, कुटुंब संरक्षण आवश्यक झाले आहे. आज कुटुंबाची स्थिती काय याचे चिंतन आवश्यक आहे. आमच्या देशात सामाजिक समरसता होती. तेव्हाच सर्व समाजाला ऋषी स्थान दिले आहे. भारतात जातीला नव्हे तर ज्ञानाला महत्त्व दिले जात असल्याचे त्या म्हणाल्या. भाषणाने संरक्षण होणार नाही. ते व्यक्तिगत आचरणात आणावे लागेल. ते पुढच्या पिढीला शिकवावे लागेल. संस्कार कमी होत आहेत. त्यासाठी स्त्री योगदान देऊन शकतात म्हणूनच तिला नारायणी नमस्तुते म्हणतात. भारत स्वत:साठी नव्हे तर विश्वाच्या कल्याणासाठी सामर्थ्यशाली व्हावा, असे शांताका म्हणाल्या.

डॉ. श्वेता काळे पिसुळकर यांनी हा उत्सव राष्ट्रभतीचे प्रतिक आहे. येथुन सांस्कृतिक जागरण होते. येथील प्रेरणा अनुकरणीय आहे. शस्त्र कर्तव्य आणि सय्यमाचे प्रतिक आहे. आपण स्वत: महिला सशतीकरणात सहयोग देऊ असे आश्वासन दिले. संचालन, प्रास्ताविक व आभार प्रदर्शन सविता पराडकर यांनी केले. कार्यक्रमाला जिल्हा संघचालक जेठानंद राजपूत, नगर संघचालक डॉ. प्रसाद देशमुख यांच्यासह स्वयंसेवक व सेविकांची मोठ्या संख्येने उपस्थिती होती. सुरुवातीला वैयक्तिक गीत, सांघिक गीत, श्लोक आणि अमृत वचन झाले.

– झारखंडमध्ये १३ आणि २० नोव्हेंबरला मतदान,

– पोटनिवडणुकीच्या तारखाही जाहीर,
नवी दिल्ली, (१५ ऑक्टोबर) – निवडणूक आयोगाने महाराष्ट्र आणि झारखंड विधानसभा निवडणुकांच्या तारखा जाहीर केल्या आहेत. महाराष्ट्रात २० नोव्हेंबरला निवडणूक होणार असून २३ नोव्हेंबरला मतमोजणी होणार आहे. महाराष्ट्रात एकाच टप्प्यात निवडणुका होणार आहेत. तर झारखंडमध्ये १३ आणि २० नोव्हेंबरला मतदान होणार असून २३ नोव्हेंबरलाच निकाल लागणार आहे. झारखंडमध्ये दोन टप्प्यात निवडणुका होणार आहेत.
आज १५ ऑक्टोबर रोजी महाराष्ट्र आणि झारखंड विधानसभा निवडणुकांसाठी पत्रकार परिषद घेत असल्याचं निवडणूक आयोगानं पत्रक प्रसिद्ध केलं आहे. प्रत्येक निवडणुकीची एक ठरलेली प्रक्रिया असते आणि ही प्रक्रिया कधी सुरू होते, तर निवडणुकीच्या तारखांची घोषणा झाल्यावर. निवडणूक आयोगानं विधानसभा किंवा लोकसभा निवडणुकीच्या तारखा जाहीर करताच मॉडेल कोड ऑफ कंडक्ट अर्थात निवडणूक आचारसंहिता लागू होते.
मॉडेल कोड ऑफ कंडक्ट म्हणजे आचारसंहिता काय असते?
मुख्य निवडणूक आयुक्त राजीव कुमार म्हणाले की, महाराष्ट्रात ९ कोटी ६३ लाख मतदार असतील. येथे ५ कोटी पुरुष मतदार आहेत. येथील एक लाख मतदान केंद्रावर मतदान होणार आहे. महाराष्ट्रात प्रत्येक बूथवर सुमारे ९६० मतदार असतील. मुंबईत मतदान केंद्र वाढवण्यात आले आहेत.
राजीव यांनी सांगितले की झारखंडमध्ये २ कोटी ६० लाख मतदार आहेत. येथे १ कोटी ३१ लाख पुरुष तर १ कोटी २९ लाख महिला मतदार आहेत. झारखंडमध्ये २९ हजार ५६२ बूथवर मतदान होणार आहे. झारखंडमध्ये प्रत्येक बूथवर ८८१ मतदार असतील.
महाराष्ट्र विधानसभा
महाराष्ट्रात विधानसभेच्या एकूण २८८ जागा आहेत, त्यापैकी बहुमतासाठी १४५ जागा आवश्यक आहेत. २०१९ च्या निवडणुकीत भाजपला १०५, शिवसेनेला ५६, राष्ट्रवादीला ५४, काँग्रेसला ४४ आणि इतरांना २९ जागा मिळाल्या होत्या.
झारखंड विधानसभा
झारखंडमध्ये विधानसभेच्या ८१ जागा आहेत. गेल्या निवडणुकीत झारखंड मुक्ती मोर्चाने (जेएमएम) ३० जागा जिंकल्या होत्या आणि भाजपने २५ जागा जिंकल्या होत्या, तर २६ जागा इतर पक्षांना गेल्या होत्या. निवडणुकीत झामुमो सर्वात मोठा पक्ष म्हणून समोर आला होता.
मतदानासाठी महत्त्वाच्या घोषणा
जास्तीत जास्त मतदारांनी मतदान करावं यासाठी आपले प्रयत्न राहाणार असल्याचं निवडणूक आयुक्तांनी सांगितलं. सिनिअर सिटिझन्स आणि दिव्यांग व्यक्तींना घरातून मतदान करण्याची सुविधा उपलब्ध करुन देण्यात येणार आहे. संपूर्ण मतदान प्रक्रियेचं व्हिडिओ शुटिंग केलं जाणार आहे. मतदान केंद्राबाहेर जास्त रांग असेल तर मतदारांच्या सुविधेसाठी खुर्च्या ठेवल्या जाणार आहेत. गुन्हेगारी पार्श्वभूमी असलेल्या उमेदावारांची माहिती निवडणूक आयोगाला द्यावी लागणार आहे. पैसे, मद्य, ड्रग्स वाटप्यावर कडक नजर ठेवली जाणार आहे. मतदान केंद्र दोन किलोमीटरच्या आत असावेत असं सूचना करण्यात आल्या आहेत.
पोटनिवडणुकीच्या तारखाही जाहीर
उत्तर प्रदेशमध्ये  १३ नोव्हेंबरला ९ जागांवर पोटनिवडणूक होणार आहे.
उत्तराखंडमधील केदारनाथमध्ये २० नोव्हेंबरला विधानसभेची पोटनिवडणूक होणार आहे.
वायनाडमध्ये १३ नोव्हेंबरला लोकसभा पोटनिवडणूक होणार आहे.
पोटनिवडणुकीचा निकालही २३ नोव्हेंबरला लागणार आहे.
ईव्हीएम पूर्णपणे सुरक्षित
निवडणूक आयोगाने तारखांच्या घोषणेदरम्यान ईव्हीएममध्ये कोणताही दोष नसल्याचे निवडणूक आयोगाने म्हटले आहे. ईव्हीएम पूर्णपणे सुरक्षित आहे. ईव्हीएमच्या बॅटरीवर पोलिंग एजंटची सहीही असेल. ईव्हीएम थ्री लेयर सिक्युरिटी अंतर्गत असतील. निवडणूक आयोगाने सांगितले की, ईव्हीएममध्ये एकल वापराच्या बॅटरी असतात. ईव्हीएममध्ये मोबाईलप्रमाणे बॅटरी नसतात. विशेष म्हणजे ईव्हीएममधील गैरप्रकारांबाबत विरोधकांकडून अनेकदा विधाने केली जात आहेत. अशा परिस्थितीत निवडणूक आयोगाने ईव्हीएमबाबत सर्व काही आधीच स्पष्ट केले आहे.

– उपमुख्यमंत्री फडणवीस यांची घोषणा,

– योजनेचा औपचारिक शुभारंभ,
पुणे, (१७ ऑगस्ट) – ही खटाखटसारखी नाही, फटाफट चालणारी योजना आहे. ज्या बहिणींचे अर्ज रखडले, त्यांना तीन महिन्यांचे ४५०० रुपये एकदम मिळणार आहे, अशी घोषणा उपमुख्यमंत्री देवेंद्र फडणवीस यांनी आज येथे केली. पुण्यात मुख्यमंत्री लाडकी बहीण राज्यस्तरीय शुभारंभ करण्यात आला. त्यावेळी ते बोलत होते. आज अतिशय आनंदाचा दिवस आहे. लाडकी बहीण योजनेचा औपचारिक शुभारंभ झाला. सुरुवात पुण्यापासून का, असे मला विचारण्यात आले. ज्यावेळी परकियांचे आक्रमण झाले, तेव्हा आई जिजाऊंनी स्वराज्याची संकल्पना शिवरायांना दिली. महिलांना शिक्षणाचा अधिकार नाकारला गेला, त्यावेळी महात्मा ज्योतिबा फुले आणि सावित्रीबाई फुले सांगितले की, महिलांना शिक्षणाचा अधिकार आहे. त्यांनी मुलींसाठी पहिली शाळा याच पुण्यात सुरू केली. त्यामुळे पुणे हे महत्त्वाचे शहर आहे, असे फडणवीस म्हणाले.
देना बँक सरकार
आमचे देना बँक सरकार आहे. याआधी राज्यात लेना बँक सरकार होते. मागच्या काळातील सरकार वसुली करणारे होते. आताचे सरकार बहिणींना देणारे आहे. योजनेची सुरुवात केली आहे. आतापर्यंत एक कोटी तीन लाख महिलांच्या खात्यात प्रत्येकी तीन हजार रुपये जमा झाले आहेत. आता काही मोजक्याच महिला बाकी आहेत. काळजी करू नका, प्रत्येकाच्या खात्यात पैसे जमा होतील, असे फडणवीस म्हणाले.
सावत्र भावांच्या पोटात खूप दुखले
आम्ही या योजनेची घोषणा केली, तेव्हा सावत्र भावांच्या पोटात खूप योजना होऊ नये म्हणून ते न्यायालयात गेले. न्यायालयाने त्यांना फटकारल्यानंतर जाणीवपूर्वक अर्ज भरून घेत, त्यावर पुरुषांचे फोटो लावले; जेणेकरून महिलांना सांगता येईल की, तुमचे अर्ज आम्ही सरकारला दिले होते. सरकारने ते अर्ज स्वीकारले नाही. काही ठिकाणी मोटरसायकलचे फोटो लावले. जाणीवपूर्वक अशा प्रकारचे फोटो लावून अर्ज नाकारले जातील आणि महिलांना मिळू नये, असा प्रयत्न करण्यात आला. पोर्टल स्लो व्हावे, असा प्रयत्न करण्यात आला. पोर्टल बंद पडले, असा अपप्रचार केला. आम्ही ऑफलाईन अर्ज स्वीकारले. ते पुन्हा पोर्टलवर आणले आणि बहिणींच्या खात्यात पैसे जमा केले, असे फडणवीस यांनी सांगितले.

– रावसाहेब दानवेंचे उद्धव ठाकरेंना आव्हान,

मुंबई, (०८ ऑगस्ट) – हिंदुत्व सोडले नसल्याचा दावा करणार्‍या उद्धव ठाकरेंनी बांगलादेशाच्या परिस्थितीवरून भाकीत केले. मात्र, बांगलादेशातील हिंदूंवर होत असलेल्या अत्याचारावर ‘ब‘’ देखील उच्चारला नाही. तुमच्यात थोडही हिंदुत्व शिल्लक असेल तर, बांगलादेशातील अत्याचारांवर बोला, असे आव्हान भाजपाचे ज्येष्ठ नेते व माजी केंद्रीय मंत्री दानवे यांनी उद्धव ठाकरेंना दिले.
भाजपा प्रदेश कार्यालयात झालेल्या पत्रकार परिषदेत ते बोलत होते. यावेळी प्रदेश मुख्य प्रवक्ते केशव उपाध्ये, प्रदेश समन्वयक विश्वास पाठक उपस्थित होते. दिल्ली दौर्‍यामधील पत्रकार परिषदेमधून बांगलादेशबाबत बोलताना ठाकरे यांनी अकलेचे तारे तोडले, बांगलादेशसारखी स्थिती भारतात देखील उद्भवू शकते. अशी चिथावणीखोर भाषा, हिंदुत्वापासून कोसो दूर उद्धव ठाकरे यांनी त्वरित थांबवावी असाही इशारा दानवे यांनी दिला. बांगलादेशमध्ये हिंदूंच्या हत्या होत असताना निषेध करण्याएवढेही उबाठा सेनेचे हिंदुत्व जागृत नाही, असा सणसणीत टोला त्यांनी लगावला.
दानवे यांनी सांगितले की, मुख्यमंत्री एकनाथ शिंदे, उपमुख्यमंत्री देवेंद्र फडणवीस, अजित पवार हे राज्याच्या भल्यासाठी, जनतेच्या हितासाठी दिल्लीला जातात. त्यावेळी महाराष्ट्र दिल्लीच्या चालू देणार नाही या शब्दांत उद्धव ठाकरे टीका करतात. मग, हेच ठाकरे महाशय आता दिल्ली दौर्‍यावर का गेले, मुख्यमंत्रिपदाची याचना करण्यासाठी कोणाच्या दारात गेले, असा सवाल त्यांनी केला. दिल्ली दौर्‍यामध्ये ठाकरे यांनी आपणच किती कार्यक्षम मुख्यमंत्री होतो हे दाखवण्याचा केविलवाणा प्रयत्न करीत विविध नेत्यांच्या भेटींदरम्यान मुख्यमंत्रिपदाची याचना करण्याचा पुरेपूर केला. महाविकास आघाडीतील एका सहकार्‍याने त्यांच्या पुस्तकात तत्कालीन मुख्यमंत्री ठाकरे त्यांच्या संपूर्ण मु‘यमंत्रिपदाच्या कार्यकाळात केवळ एक दिवस मंत्रालयात गेले याची खंत वाटते, असे मत व्यक्त केले होते. यावरूनच एक मु‘यमंत्री म्हणून, ठाकरेंची कार्यक्षमता काय होती हे दिसून येते असा टोलाही त्यांनी लगावला.

कोल्हापूर, (२६ जुन) – सांगली जिल्ह्यात मुसळधार पाऊस सुरूच असून नद्यांनीही धोक्याची पातळी ओलांडली आहे. त्यामुळं पुराचे पाणी आता रस्त्यावर येऊ लागले आहे. कोल्हापूरात नदीचे पाणी शहरात शिरले आहे. त्यामुळं जनजीवन विस्कळीत झाले आहे. तसंच, सांगलीलाही पुराचा धोका वाढत चालला आहे. सांगली जिल्ह्यात धरणक्षेत्रात होत असलेल्या संततधार पावसामुळं धरणे तुडुंब भरली आहेत. कोल्हापूर जिल्ह्यात मुसळधार पाऊस सुरूच आहे. पंचगंगा नदी धोक्याच्या पातळीवरून वाहत असून या नदीच्या पण्यामुळे अनेक मार्गावर मोठ्या प्रमाणात पाणी आले आहे. पंचगगा नदी धोका पातळी वरून वाहत असून नदीची पाणी पातळी ४४ फूट ४ इंच इतकी झाली आहे. जिल्ह्यातील ८१ बंधारे पाण्याखाली गेले आहेत. जिल्ह्यातील राधानगरी धरण १०० टक्के भरले आहे. राधानगरी धरणाचे एकूण ६ स्वयंचलीत दरवाजे उघडले असून त्यातून १० हजार ६८ क्युसेक पाण्याचा विसर्ग भोगावती नदी पात्रात सुरू आहे.

आज पहाटे ५ वाजता धरणाचा स्वयंचलित क्रमांक १ चा दरवाजा उघडला. त्यामूळे नदी काठच्या लोकांनी सतर्क राहण्याच्या सूचना दिल्यास आहेत. जिल्ह्यांतील इतर नद्याही दुथडी भरून वाहत आहेत. यातील अनेक नद्यांचे पाणी रस्त्यावर आले आहे. चंदगड तालुक्यातील कोवाड गावातील बाजारपेठेत ताम्रपणे नदीचे पाणी घुसले आहे. बाजारपेठेत सध्या दोन फूट पाणी आहे. इचलकरंजी शहरामधील सखल भागात पंचगंगा नदीचे पाणी घुसू शकते त्यामुळे सकल भागातील नागरिकांचे स्थलांतर करण्यात आले आहे. एकूण ११ राज्यमार्ग मार्गावर पाणी आले आहे. प्रमुख जिल्हा मार्गावर २९ ठिकाणी पाणी आहे. तर १३ जिल्हा आणि २५ ग्रामीण मार्ग बंद आहेत. दरडप्रवण/भूस्खल गावांमधुन एकूण १६ व्यक्तीचे स्थलांतर करण्यात आले आहे. पूरग्रस्त महानगरपालिका हद्दीतील एकुण ५४ जणांचे सुरक्षित स्थलांतर करण्यात आले आहे. करवीर तालुक्यातील आंबेवाडी गावातील ५८७ जणांचे स्थलांतर करण्यात आले. हातकणंगले व शिरोली गावातील एकुण १३ जणांचे स्थलांतर करण्यात आले आहे. इचलकरंजी मधील रुई, इंगळी येथील एकुण ५३ जणांचे स्थलांतर करण्यात आले.
कृष्णा नदी पाणलोट क्षेत्रामध्ये पाऊसाची संततधार कायम आहे.त्यामुळे सांगलीत कृष्णा नदीच्या पाण्याचे पातळीमध्ये झपाट्याने वाढ होऊन कृष्णा नदीची वाटचाल आता इशारा पातळीकडे सुरू झाली आहे. ६ वाजेपर्यंत कृष्णेची पातळी ३६ फुटांवर पोहचली आहे.४० इशारा तर ४५ फूट ही धोक्याची पातळी आहे, तर पाण्याची पातळी वाढत असून शेरीनाल्याच्या माध्यमातून आता कृष्णेचे पाणी शहरातील सखल भागात शिरू लागले आहे,कर्नाळ रोडवरील पुल आता पाण्याखाली गेला आहे,त्यामुळे नांद्रे-पलूसकडे जाणारी वाहतूक अन्यमार्गाने वळवण्यात आली आहे.तसेच काकानगर परिसरातील नागरिकांनी आता स्थलांतर सुरू केले आहे.
सांगलीच्या शिराळा तालुक्यातील चांदोली धरण पाणलोट क्षेत्रात अतिवृष्टी कायम आहे. गेल्या २४ तासात १६८ मिलिमीटर पाऊसाची नोंद झाली आहे.यामुळे चांदोली धरण ८८.७३ टक्के भरले आहे.३४.४० टीएमसी साठवण क्षमता असणार्‍या धरणात ३०.५३ टीएमसी पाणीसाठा निर्माण झाला असून पाण्याची आवक सुरूच असल्याने धरणातुन विसर्ग वाढवून १० हजार ११७ क्युसेक पाणी वारणा नदीत विसर्ग करण्यात येत आहे. त्यामुळे वारणा नदीच्या पाणी पातळीत आणखी वाढ झाली असून वारणा नदीला पूर आला असून शेकडो एकर शेती पाणी खाली गेली आहे,तर ११ बंधारे आणि ३ पूल पाण्याखाली गेले आहेत. तर वारणा नदीची पाण्याची पातळी वाढत असल्याने नदीकाठच्या नागरिकांना सतर्क राहावे,अश्या सूचना प्रशासनाकडून देण्यात आल्या आहेत.

मुंबई, (२० जुन) – महायुती सरकारने अहमदनगर शहराचे नामांतर अहल्यानगर करण्यात येणार असल्याचे जाहीर केले होते. मुख्यमंत्री एकनाथ शिंदे यांनी चौंडी येथील कार्यक्रमातून याबाबतची घोषणा केली होती. मात्र, अहमदनगरचे नामांतर करण्यास विरोध करणारी याचिका मुंबई उच्च न्यायालयात दाखल करण्यात आली आहे. दरम्यान, राज्य सरकारने या नामांतरास मंजुरी दिली असली, तरी केंद्र सरकारची मान्यता घेणे गरजेचे आहे.

राज्य सरकारच्या या निर्णयाविरोधात मुबंई उच्च न्यायालयाच्या औरंगाबाद खंडपीठात माजी कुलगुरू सर्जेराव निमसे, अर्शद शेख आणि पुष्कर सोहोनी यांनी ही याचिका दाखल केली. यावर पहिली सुनावणी ही २५ जुलै रोजी होणार आहे. पुण्यश्लोक अहल्यादेवी होळकर यांचे जन्मस्थान असलेल्या अहमदनगर येथील चौंडी येथे अहल्यादेवी होळकर यांच्या २९८ व्या जयंतीनिमित्त झालेल्या कार्यक्रमात मुख्यमंत्री एकनाथ शिंदे यांनी अहल्यानगर नावाची घोषणा केली होती. अहमदनगर महापालिकेच्या प्रशासकांनी देखील तसा ठराव पाठवला होता. राज्य सरकारने मंत्रिमंडळात अहल्यानगर नावाच्या प्रस्तावाला मान्यता दिली. सध्या हे प्रकरण केंद्र सरकारच्या मंजुरीच्या प्रतीक्षेत आहे.

– चंद्रशेखर बावनकुळे यांची माहिती,

मुंबई, (१९ जुन) – विधानसभा निवडणुकीच्या अनुषंगाने भाजपा जवळपास ९७ हजार बूथ, शक्तिकेंद्र तसेच मंडल स्तरावर संघटना सक्षमीकरणाला प्राधान्य देणार आहे, अशी माहिती पक्षाचे प्रदेशाध्यक्ष चंद्रशेखर बावनकुळे यांनी शुक‘वारी दिली. भाजपा प्रदेश कार्यालयात झालेल्या पत्रपरिषदेमध्ये ते बोलत होते. आगामी विधानसभा निवडणुकीत महायुती एकत्रितरीत्या उतरणार असून, महायुतीला मोठा विजय मिळेल, असा विश्वास बावनकुळे यांनी व्यक्त केला.
भाजपा प्रदेश कार्यालयात दोन दिवस झालेल्या ३० पदाधिकार्यांच्या बैठकीची माहिती बावनकुळे यांनी दिली. ते म्हणाले की, विधानसभा निवडणुकीसोबतच भाजपा पंचायत समिती, जिल्हा परिषद, ग्राम पंचायत आणि महापालिका निवडणुकांच्या तयारीला लागणार आहे. या बाबतची विस्तृत योजना गुरुवारी झालेल्या कोअर कमिटीच्या बैठकीत आखली गेली. पंचायत समिती, नगर पालिका आणि महापालिका स्तरावरील नेत्यांना यथायोग्य जबाबदारी दिली जाणार आहे. महायुतीच्या सर्वसमावेशक अर्थसंकल्पातील विशेष तरतुदी समाजाच्या शेवटच्या घटकापर्यंत पोहोचवण्याची योजना कोअर कमिटीच्या बैठकीत ठरवण्यात आली तसेच डबल इंजिन सरकारचा अधिकाधिक लाभ राज्यातील जनतेला कसा करून देता येईल याचीही चर्चा झाली.
२१ जुलै रोजी पुणे येथे पक्षाचे अधिवेशन होणार आहे. अधिवेशनाच्या पहिल्या सत्रात केंद्रीय मंत्री नितीन गडकरी यांचे मार्गदर्शन होणार आहे. केंद्रीय गृह मंत्री अमित शाह हे या अधिवेशनाचा समारोप करणार असल्याची माहितीही बावनकुळे यांनी दिली.
माध्यमांना कानपिचक्या
गुरुवारी झालेल्या बैठकीत मित्रपक्षांबाबत कुठल्याही प्रकारची चर्चा, टिप्पणी भाजपाच्या नेत्यांनी केली नसताना माध्यमांमधून चुकीच्या बातम्या देत महायुतीमध्ये जाणीवपूर्वक ठिणगी पाडण्याचे काम केले जात असल्याचे बावनकुळे म्हणाले. बैठकीत झालेल्या चर्चेबाबत पक्षाकडून माहिती दिली जाते. जे घडलेच नाही ते घडल्याची बातमी देणे माध्यमांनी थांबवावे, अशी विनंती बावनकुळे यांनी केली.

पुणे, (१६ जुलै) – डॉ. पूजा खेडकर यांनी आयएएस होण्यासाठी मिळवलेल्या नॉन क्रिमीलेअर दाखल्याची अहमदनगरचे जिल्हाधिकारी सखोल चौकशी करून केंद्राला अहवाल सादर करणार आहे. त्यासाठी खेडकर कुटुंबीयांच्या उत्पन्नाची माहिती आयकर विभागाकडून मागवण्यात आली. इतेकच नव्हे, तर खेडकर दाम्पत्याने भरलेल्या आयकराची माहितीही मागवली आहे. अहमदनगरचे जिल्हाधिकारी सिद्धराम सालीमठ यांनी पूजा खेडकर यांच्या नावावर असलेल्या मालमत्तांची आणि त्यातून त्यांना मिळणार्या उत्पन्नाची माहितीदेखील मागवली आहे.

वादग्रस्त पूजा खेडकरच्या प्रकरणाची केंद्र सरकारच्या कार्मिक विभागाकडून चौकशी सुरू आहे. अतिरिक्त सचिव दर्जाचे अधिकारी ही चौकशी करीत आहेत. या चौकशी समितीला स्थानिक प्रशासनाकडून सर्व माहिती दिली जाणे अपेक्षित आहे. पूजा खेडकरांचे आई-वडील विभक्त झाल्याचे तांत्रिकदृष्ट्या दाखवण्यात आले असले, तरी दोघांचे उत्पन्न तपासले जात आहे. त्याचबरोबर पूजा खेडकर यांच्या नावावर देखील कोट्यवधी रुपयांची मालमत्ता असल्याची माहिती सूत्रांनी दिली. हे सर्व तपशील पूजा खेडकरांनी आयकर विभागाकडे दाखल केलेल्या आयटीआरमधून समोर आले आहेत. ही सर्व माहिती अहमदनगरच्या जिल्हाधिकर्यांकडून गोळा केली जात आहे.
पूजा खेडकरांची पोलिसांसोबत साडेतीन तास चर्चा
पूजा खेडकरांची स्थानिक पोलिसांसोबत रात्री ११ ते पहाटे दोन वाजेपर्यंत चर्चा झाल्याची माहिती आहे. पूजा खेडकर मुक्कामी असलेल्या वाशीमच्या स्थानिक विश्रामगृहावर रात्री सव्वा दहा वाजता पोलिसांचे पथक पोहोचले होते. पूजा खेडकर यांची बंद दाराआड तीन तास चौकशी झाली. मात्र, हे पथक कुठचे होते, याची माहिती समोर आलेली नाही.
पोलिस करणार वैद्यकीय प्रमाणपत्राची चौकशी
पूजा खेडकर यांनी सादर केलेले वैद्यकीय प्रमाणपत्रे खरी आहेत का, याची तपासणी पुणे पोलिस करणार आहेत. दिव्यांग व्यक्तींसाठी असलेल्या आयुक्त कार्यालयाकडून एक पत्र मिळाले आहे, असे एका वरिष्ठ पोलिस अधिकार्याने सांगितले.

मुंबई, (११ जुन) – महाराष्ट्र एटीएसने मुंबईतून चार बांगलादेशींना अटक केली आहे. हे सर्वजण बनावट कागदपत्रांद्वारे अनेक दिवसांपासून मुंबईत बेकायदेशीरपणे वास्तव्यास होते. या चार बांगलादेशींचा एक साथीदार बनावट भारतीय कागदपत्रांद्वारे सौदी अरेबियात पळून गेला. हा बांगलादेशी गुजरातमध्ये राहून बनावट पासपोर्ट बनवत असे, असे एटीएसच्या तपासात समोर आले आहे.

यावेळी बांगलादेशी नागरिकांनी या बनावट पासपोर्टचा वापर करून लोकसभा निवडणुकीत मतदान केल्याचेही तपासात समोर आले आहे. बनावट पासपोर्टचा वापर करून काही बांगलादेशी नागरिक भारतीय नागरिक असल्याचे दाखवून परदेशात नोकरी करत असल्याचेही समोर आले आहे. याप्रकरणी एटीएस अजूनही पाच जणांचा शोध घेत आहे. अटक केलेल्या बांगलादेशींच्या संगनमताची माहिती महाराष्ट्र एटीएस काढत आहे.
आरोपींची नावे-
रियाझ हुसेन शेख, वय- ३३
सुलतान सिद्दीक शेख, वय- ५४
इब्राहिम शफिउल्ला शेख, वय- ४६
फारुख उस्मान गनी शेख, वय- ३९

नवी दिल्ली, (२५ मार्च) – महाराष्ट्रातील महायुतीच्या जागावाटपाबाबत शनिवारी रात्री उशीरा दिल्लीत बैठक झाली. या बैठकीत जागावाटपाला अंतिम रूप देण्यात आले. केंद्रीय गृहमंत्री अमित शाह यांच्या निवासस्थानी झालेल्या या बैठकीला अमित शाह, भाजपाचे राष्ट्रीय अध्यक्ष जे. पी. नड्डा, शिवसेनेचे नेते आणि मुख्यमंत्री एकनाथ शिंदे, भाजपा नेते आणि उपमुख्यमंत्री देवेंद्र फडणवीस, प्रदेश भाजपा अध्यक्ष चंद्रशेखर बावनकुळे तसेच राष्ट्रवादी काँग्रेस अजित पवार गटाचे नेते आणि उपमुख्यमंत्री अजित पवार आणि प्रफुल्ल पटेल उपस्थित होते. भाजपाच्या केंद्रीय निवडणूक समितीची बैठक लांबल्यामुळे ही बैठक रात्री १ वाजता सुरू झाली आणि ३ वाजता संपली. जागावाटपाबाबत ८० टक्के काम झाले असून, उर्वरित २० टक्के काम झाल्यानंतर जागावाटपाची घोषणा करण्यात येईल, असे देवेंद्र फडणवीस यांनी सांगितले.

काही दिवसांपूर्वी महाराष्ट्र नवनिर्माण सेनेचे राज ठाकरे यांनी दिल्लीत भाजपाचे महासचिव विनोद तावडे आणि नंतर गृहमंत्री अमित शाह यांची भेट घेतली होती. मनसे महायुतीत येणार हे स्पष्ट झाले असून, लोकसभेच्या जागावाटपात त्यालाही सामावून घ्यावे लागणार आहे. याआधी महाराष्ट्रातील महायुतीच्या जागावाटपाबाबत अमित शाह यांच्या निवासस्थानी बैठक झाली होती. त्याला मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि अजित पवार उपस्थित होते. यावेळी राज्यातील बहुतांश जागांवर सहमती झाली असून, काही जागांवर सहमती होऊ शकली नव्हती. त्यामुळे जागावाटपाला अंतिम रूप देण्यासाठी शनिवारी रात्री पुन्हा महायुतीच्या नेत्यांची दिल्लीत झाली.
महाराष्ट्रातील पाच लोकसभा मतदारसंघात पहिल्या टप्प्यात म्हणजे १९ एप्रिलला मतदान होत आहे. मात्र, पहिल्या टप्प्यात मतदान असलेल्या गडचिरोली तसेच भंडारा- गोंदिया लोकसभा मतदारसंघातील उमेदवारांची घोषणा भाजपाला करता आली नाही. या दोन्ही मतदारसंघावर राष्ट्रवादी काँगेसने दावा केला आहे. महाराष्ट्रातील आणखी काही लोकसभा मतदारसंघाबाबतही महायुतीत एकमत होऊ शकले नाही. भाजपाने २० उमेदवारांच्या नावांची घोषणा आतापर्यंत केली आहे.

मुंबई, (२५ मार्च) – राष्ट्रीय समाज पक्षाचे प्रमुख महादेव जानकर अनेक दिवस शरद पवार यांच्या संपर्कात होते. महायुतीपासून दुरावून ते मविआत जातील, असा अंदाज होता. परंतु, महादेव जानकर यांनी अचानक आपण पहिलेपासूनच महायुतीचा घटकपक्ष आहोत आणि आपल्या पक्षाला लोकसभेची एक जागाही मिळणार असल्याची भूमिका माध्यमांसमोर मांडली.

माढा लोकसभा मतदारसंघातून निवडणूक लढण्याची जानकर यांची इच्छा होती आणि महाविकास आघाडी त्यांच्यासाठी ही जागा सोडण्यास तयार होती. शरद पवार यांनी तशी तयारी दाखविली होती. याच अनुषंगाने महादेव जानकर आणि शरद पवार यांची भेट झाली होती. मात्र, या निमित्ताने होणार्या सर्व चर्चा आणि शक्यता मोडून काढत आपण महायुतीसोबतच राहणार असल्याचे जानकर यांनी रविवारी जाहीर केले. तसे संयुक्त निवेदनही त्यांनी प्रसिद्ध केले आहे. जानकर यांची ही भूमिका म्हणजे शरद पवारांसाठी मोठा धक्का मानला जात आहे.
मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि अजित पवार यांनी रविवारी राष्ट्रीय समाज पक्षाचे नेते महादेव जानकर यांच्याशी चर्चा केली. या चर्चेअंती जानकर यांनी आपण महायुतीसोबतच राहणार असल्याचे ठामपणे सांगितले. महादेव जानकर यांची एकनाथ शिंदे, देवेंद्र फडणवीस, अजित पवार यांच्यासोबत बैठक झाली. या बैठकीत सविस्तर चर्चा केली. जानकर यांनी महायुतीत राहणार असल्याचा निर्वाळा दिला. त्यांना एक जागा देण्याचा निर्णय झाला आहे. महायुतीचे जागावाटप होईल, त्यावेळी त्यांना कुठला मतदारसंघ देण्यात आला, ते जाहीर केले जाईल. महादेव जानकर यांच्यामुळे महायुती अधिक बळकट होईल. ४५ पेक्षा जास्त जागा जिंकण्याचे उद्दिष्ट आहे., त्याला ताकद मिळेल. असा विश्वास बैठकीत उपस्थित असलेले राकाँचे प्रदेशाध्यक्ष सुनील तटकरे यांनी व्यक्त केला.

– अजित पवारांची उदयनराजेंना उमेदवारीचा प्रस्ताव,

सातारा, (२५ मार्च) – महायुतीत सातारा लोकसभा मतदारसंघाची जागा भाजपा आणि राष्ट्रवादी काँग्रेससाठी डोकेदुखी ठरत आहेत. महायुतीकडून साताऱ्यात उदयनराजे भोसले यांना उमेदवारी देण्यावर एकमत झाले आहे. मात्र, महायुतीत ही जागा राष्ट्रवादी काँग्रेसकडेच राहणार असल्याच्या भूमिकेवर अजित पवार कायम आहेत. त्यामुळे उदयनराजेंनी घड्याळ चिन्हावर निवडणूक लढवावी, असा प्रस्ताव त्यांनी दिला. मात्र, उदयनराजे भाजपाच्या कमळावरच निवडणूक लढवण्याच्या भूमिकेवर ठाम आहेत. त्यामुळे महायुतीत सातारा लोकसभा मतदारसंघाचा तिढा सुटता सुटत नसल्याचे चित्र आहे.
सातारा लोकसभा मतदारसंघातून निवडणूक लढवण्यासाठी उदयनराजे भोसले इच्छुक आहे. मात्र, भाजपाकडून जाहीर करण्यात आलेल्या यादीत त्यांचे नाव नसल्याने त्यांनी थेट दिल्ली गाठली आहे. मागील तीन दिवसांपासून दिल्लीत ठाण मांडून असलेल्या उदयनराजे भोसले यांनी शनिवारी रात्री अमित शाह यांची भेट घेतली. त्यामुळे अमित शाह यावर काही तोडगा काढणार, हे पाहणे महत्त्वाचे असणार आहे.
सातारा लोकसभा मतदारसंघ राकाँचा बालेकिल्ला समजला जातो. त्यामुळे महायुतीत देखील या जागेवर राष्ट्रवादी काँग्रेसकडून दावा केला आहे. अशात उदयनराजे भोसले भाजपाकडून या मतदारसंघातून निवडणूक लढवण्यासाठी इच्छुक आहेत, पण अजित पवारांकडून या मतदारसंघावर दावा करण्यात आल्याने भाजपाची कोंडी झाली. अशात उदयनराजे यांनी घड्याळ चिन्हावर निवडणूक लढवावी, असा प्रस्ताव अजित पवारांकडून देण्यात आला आहे. मात्र, कोणत्याही परिस्थितीत राकाँ हा मतदारसंघ सोडणार नसल्याची भूमिका अजित पवारांची आहे.

सांगली, (२१ मार्च) – सुशिक्षित वर्गामध्ये मतदान करण्याविषयी फारशी रुची दिसून येत नाही. मात्र अशाही स्थितीत काहीजण प्रकाशाचा किरण बनतात. असाच एक किरण शिराळामध्ये आहे. त्यांचे नाव महादेव दंडगे, स्वातंत्र्य सैनिक, वय वर्ष फक्त १०३! या वयातही देशप्रेम, कणखरता, जिद्द या शब्दांनी ओतप्रोत भरलेलं, एक समृद्ध, सफल आयुष्य!

ही गोष्ट आहे एका देशप्रेमी मतदाराची ! शिराळा मतदार संघ विधानसभेला सांगली जिल्ह्याशी तर लोकसभेला कोल्हापूर जिल्ह्यातील हातकणंगले मतदार संघाशी जोडलेला आहे. या मतदारसंघाची पाहणी करण्यासाठी तेथील निवडणूक निर्णय अधिकारी संजय शिंदे हे गेले होते. सोबत शिराळ्याच्या तहसीलदार श्यामला खोत या ही होत्या. यंदा निवडणूक आयोगाने ८५ वर्षांपुढील तसेच अंध मतदारासाठी विशेष बाब म्हणून घरातूनच मतदान करण्याची सोय या निवडणुकीत केली आहे.
निवडणूक आयोगाच्या या मतदान उपक्रमाबाबत माहिती सांगण्यासाठी शिंदे यांनी शिराळाचा दौरा केला. यावेळेस त्यांना या ठिकाणी दंडगे नावाचे स्वातंत्र्य सैनिक (वय -१०३ )असल्याचे समजले. त्यांची शिंदे यांनी आपुलकीने भेट घेत घरून मतदान करण्याबाबत सुचित केले. त्यावर दंडगे यांनी स्मित हास्य करत सांगितले,’’छे…छे ! मी घरून मतदान करणार नाही तर प्रत्यक्ष मतदान केंद्रावर जाऊनच त्या ठिकाणी मतदान करणार.’’ त्यांची ही जिद्द पाहून निवडणूक निर्णय अधिकारी शिंदे ही क्षणभरासाठी थबकले. जर या १०३ वर्षाच्या नवतरुण मतदाराचा आदर्श मतदानाकडे पाठ फिरविणार्‍या नागरिकांनी घेतला तर जगातील सर्वात मोठ्या लोकशाहीचं हे मोठं यश ठरणार आहे.

– सर्वोच्च न्यायालयाचा निर्णय,

नवी दिल्ली, (१९ मार्च) – राष्ट्रवादी काँग्रेसमधील शरद पवार गटाला सर्वोच्च न्यायालयाचा मोठा धक्का बसला आहे. सुप्रीम कोर्टाने अजित पवार गटाला घड्याळ निवडणूक चिन्ह वापरण्याची परवानगी दिली आहे. तर शरद पवार यांना तुतारी वाजवणाऱ्या माणसाचा निवडणूक चिन्ह म्हणून वापर करण्याची परवानगी देण्यात आली आहे. शरद पवार गटाने दाखल केलेल्या याचिकेवर सर्वोच्च न्यायालयाने हा आदेश दिला आहे. तुम्हाला सांगतो की, फाळणीपूर्वी राष्ट्रीय काँग्रेस पक्षाचे निवडणूक चिन्ह घड्याळ होते.
शरद गटाने बंदीची मागणी केली होती
सुप्रीम कोर्टात दाखल केलेल्या याचिकेत, शरद पवार गटाने अजित पवार गटाला निवडणूक आयोगाने दिलेले ‘घड्याळ’ निवडणूक चिन्ह वापरण्यापासून रोखण्याची मागणी केली होती, कारण ते लेव्हल प्लेइंग फिल्डमध्ये अडथळा आणत होते. न्यायमूर्ती सूर्यकांत आणि न्यायमूर्ती विश्वनाथन यांच्या खंडपीठाने हा युक्तिवाद फेटाळून लावत अजित पवार गटाला घड्याळ निवडणूक चिन्ह वापरण्याची परवानगी दिली.
न्यायालयाने अजित पवार गटाला हा आदेश दिला
हे निवडणूक चिन्ह इतर कोणत्याही पक्षाला किंवा अपक्ष उमेदवाराला देऊ नये, असे निर्देशही सर्वोच्च न्यायालयाने निवडणूक आयोगाला दिले आहेत. ‘घड्याळ’ हे निवडणूक चिन्ह न्यायप्रविष्ट असून त्याचा वापर निर्णयाच्या अधीन असेल, अशी जाहीर नोटीस इंग्रजी, हिंदी आणि मराठी भाषेतील वृत्तपत्रांमध्ये प्रसिद्ध करण्यास न्यायालयाने अजित पवार गटाला सांगितले. सुप्रीम कोर्टाने अजित पवार गटाला निवडणुकीशी संबंधित सर्व दृकश्राव्य जाहिराती आणि बॅनर्स आणि पोस्टर्स इत्यादींमध्ये समान घोषणा करण्यास सांगितले. निवडणूक आयोगाने ६ फेब्रुवारी रोजी अजित यांच्या गटाला खरी राष्ट्रवादी म्हणून स्वीकारले होते.
यापूर्वी ६ फेब्रुवारी रोजी निवडणूक आयोगाने अजित पवार गटालाच खरा राष्ट्रवादी काँग्रेस पक्ष मानला होता. निवडणूक आयोगाने बहुमताच्या जोरावर हा निर्णय घेतला. अजित पवार गट राष्ट्रवादी काँग्रेस पक्षाचे नाव आणि निवडणूक चिन्ह (घड्याळ) वापरू शकतो, असे निवडणूक आयोगाने त्यावेळी सांगितले होते.

मुंबई, (१८ मार्च) – एका रॅलीला संबोधित करताना, काँग्रेसचे खासदार राहुल गांधी यांनी दावा केला होता की महाराष्ट्राचा एक नेता त्यांच्या आई सोनिया गांधींसमोर रडले होते आणि म्हणाले होते की मला लाज वाटते की ते “या शक्तीशी यापुढे लढू शकत नाहीत आणि त्यांना तुरुंगात जायचे नाही.” भारतीय जनता पक्षाचे (भाजप) राज्यसभा सदस्य अशोक चव्हाण यांनी सोमवारी सांगितले की, काँग्रेस सोडण्यापूर्वी मी पक्षाच्या ज्येष्ठ नेत्या सोनिया गांधी यांची भेट घेतली नव्हती आणि या संदर्भात राहुल गांधी यांची टिप्पणी ‘निराधार’ असल्याचे सांगितले.

काँग्रेस सोडून भाजपमध्ये दाखल झालेल्या ‘ज्येष्ठ नेत्या’ची राहुल गांधींनी खिल्ली उडवली; आई सोनिया यांच्याशी झालेल्या संभाषणाचा उल्लेख केला. लोकसभा निवडणुकीच्या अगोदर रविवारी मुंबईत एका सभेला संबोधित करताना, काँग्रेस खासदार राहुल गांधी यांनी दावा केला होता की महाराष्ट्राचा एक नेता त्यांच्या आई सोनिया गांधींसमोर रडले होते आणि म्हणाले होते की मला लाज वाटते की ते “या शक्तीशी यापुढे लढू शकत नाहीत आणि त्यांना तुरुंगात जायचे नाही.” त्याला उत्तर देताना चव्हाण यांनी सोमवारी एका व्हिडीओ संदेशात म्हटले आहे की, राहुल गांधी यांनी रविवारी एका सभेत वक्तव्य केले आणि कोणाचेही नाव घेतले नाही. महाराष्ट्राचे माजी मुख्यमंत्री म्हणाले, “ते माझ्याबद्दल असे बोलत असतील तर ते अतार्किक आणि निराधार आहे. सत्य हे आहे की मी काँग्रेसचा राजीनामा देईपर्यंत पक्ष मुख्यालयात काम करत होतो.” ते म्हणाले, “मी आमदारपदाचा राजीनामा दिला आणि काही काळानंतर मी पक्षाचाही राजीनामा दिला. तोपर्यंत मी राजीनामा दिल्याचे कोणालाच माहीत नव्हते.” चव्हाण म्हणाले, “मी कधीच सोनिया गांधींना भेटलो नाही. मी सोनिया गांधींना भेटून माझ्या भावना व्यक्त केल्या हे म्हणणे निराधार आहे. निवडणुकीच्या दृष्टिकोनातून केलेले हे राजकीय वक्तव्य आहे.”काँग्रेस सोडल्यानंतर चव्हाण यांनी भाजपमध्ये प्रवेश केला. भाजपने त्यांना राज्यसभा निवडणुकीत महाराष्ट्रातून तिकीट दिले होते. पुढे त्यांची राज्यसभेवर बिनविरोध निवड झाली.

– मुख्यमंत्र्यांची राहुल गांधींवर अप्रत्यक्ष टीका,

मुंबई, (१७ मार्च) – आपल्या पंतप्रधानांनी एकही दिवस सुटी घेतलेली नाही. देशासाठी वाहून घेत अविरत काम करणार्या व्यक्तीला बदनाम करण्याशिवाय, विदेशात फिरायला जाण्यार्यांना दुसरे कामच काय? अशा शब्दांत खोचक टीका मुख्यमंत्री एकनाथ शिंदे यांनी केली. मंत्रिमंडळ बैठकीनंतर सह्याद्री अतिथीगृह येथे झालेल्या पत्रपरिषदेत ते बोलत होते. पंतप्रधान नरेंद्र मोदी हे जगातील सर्वोत्कृष्ट नेता आहे. जगाच्या क्रमवारीत ते पहिल्या क्रमांकावर आहेत. १० वर्षांच्या पंतप्रधानपदाच्या कार्यकाळात त्यांनी एकही दिवस सुटी घेतली नाही. देशाची प्रतिमा उंचावण्यासाठी ते रात्रंदिवस काम करतात. अशा नेत्याला बदनाम करण्याचे काम सतत विदेशात सुट्या घालविण्यासाठी जाणारे काही नेते करीत असतात. असा बोचरा टोला मुख्यमंत्र्यांनी राहुल गांधींना लगावला.
पावणे दोन वर्षांत घेतले सामान्यांच्या हिताचे निर्णय
राज्य शासनाने गेल्या पावणे दोन वर्षांत मंत्रिमंडळ बैठकांमध्ये शेतकरी, कामगार, महिला, युवा, ज्येष्ठ नागरिक असे सामान्य जनतेच्या हिताचे लोकाभिमुख निर्णय घेतले आहेत. आजच्या मंत्रिमंडळ बैठकीत देखील जनहिताचे निर्णय घेतले असून, त्यात कापूस, सोयाबीन उत्पादक शेतकर्यांना भावांतर पद्धतीने लाभ देण्यासाठी ४ हजार कोटींची तरतूद करण्यात आली आहे. सगेसोयरे व्याख्यासंदर्भात प्रसिद्ध करण्यात आलेल्या अधिसूचनेवर हरकती व सूचनांची छाननीची कार्यवाही सुरू असून, ४ लाख हरकतींची नोंद व छाननी पूर्ण झाली आहे, असे मुख्यमंत्री शिंदे यांनी सांगितले. यावेळी उपमुख्यमंत्री देवेंद्र फडणवीस, अजित पवार, मंत्री धनंजय मुंडे, दीपक केसरकर, संजय बनसोडे उपस्थित होते.
आमच्या सरकारने पहिल्या दिवसापासून आजपर्यंत सामान्य नागरिकांच्या हिताचे निर्णय सुमारे ५० ते ६० मंत्रिमंडळाच्या बैठकांमध्ये घेतले आहेत. मराठा समाजाला टिकणारे आरक्षण देण्याची शासनाची पहिलेपासूनच भूमिका आहे. त्यासाठी विशेष अधिवेशन घेऊन मराठा समाजाला १० टक्के आरक्षणाचा निर्णय घेतला, असे मुख्यमंत्री म्हणाले.

– महाराष्ट्रात लोकसभा निवडणुकीचे पूर्ण वेळापत्रक!,

नवी दिल्ली, (१६ मार्च) – केंद्रीय निवडणूक आयोगाने लोकसभेच्या निवडणुकांचे वेळापत्रक जाहीर केले असून, महाराष्ट्रातील ४८ जागांसाठी ५ टप्प्यांमध्ये निवडणूक घेण्यात येणार आहे.
पहिल्या टप्प्यात विदर्भातील पाच जागांसाठी निवडणूक होणार आहे. या टप्प्यात रामटेक, नागपूर, भंडारा-गोंदिया, गडचिरोली-चिमूर आणि चंद्रपूर या मतदारसंघामध्ये मतदान होईल. या जागांसाठीची अधिसूचना २० मार्च रोजी जारी होईल. नामांकन अर्ज दाखल करण्याची अंतिम दिनांक २७ मार्च रोजी असून, अर्जांची छाननी २८ मार्च रोजी पूर्ण होईल. तर, ३० मार्च रोजीपर्यंत उमेदवार आपले नामांकन अर्ज मागे घेऊ शकतील. या मतदारसंघांमध्ये १९ एप्रिल रोजी मतदान होणार आहे.
दुसर्‍या टप्प्यात बुलढाणा, अकोला, अमरावती, वर्धा, यवतमाळ-वाशिम, हिंगोली, नांदेड आणि परभणी मतदारसंघांमध्ये निवडणूक होईल. या निवडणुकीची अधिसूचना २८ मार्च रोजी जारी होईल. नामांकन अर्ज दाखल करण्याची अंतिम दिनांक ४ एप्रिल रोजी असून, अर्जांची छाननी ५ एप्रिल रोजी पूर्ण होईल. तर, ८ एप्रिल रोजीपर्यंत उमेदवार आपले नामांकन अर्ज मागे घेऊ शकतील. या मतदारसंघांमध्ये २६ एप्रिल रोजी मतदान होणार आहे.
तिसर्‍या टप्प्यात रायगड, बारामती, धाराशिव, लातूर, सोलापूर, मढ, सांगली, सातारा, रत्नागिरी-सिंधुदुर्ग, कोल्हापूर आणि हातकणंगले या मतदारसंघांमध्ये निवडणूक घेतली जाणार आहे. या निवडणुकीची अधिसूचना १२ एप्रिल रोजी जारी होईल. नामांकन अर्ज दाखल करण्याची अंतिम दिनांक १९ एप्रिल रोजी असून, अर्जांची छाननी २० एप्रिल मार्च रोजी पूर्ण होईल. तर, २२ एप्रिल रोजीपर्यंत उमेदवार आपले नामांकन अर्ज मागे घेऊ शकतील. या मतदारसंघांमध्ये ७ मे रोजी मतदान होणार आहे.
चौथ्या टप्प्यात १३ मे रोजी नंदूरबार, जळगाव, रावेर, जालना, छत्रपती संभाजीनगर, मावळ, पुणे, शिरुर, अहमदनगर, शिर्डी आणि बीड या मतदारसंघांमध्ये मतदान होणार असून पाचव्या टप्प्यात २० मे रोजी धुळे, दिंडोरी, नाशिक, पालघर, भिवंडी, कल्याण, ठाणे आणि मुंबईतील सर्व सहा मतदारसंघांमध्ये मतदान होणार आहे. देशभरात सर्वत्र ४ जून रोजी मतमोजणी होणार असून, ६ जूनपूर्वी लोकसभा निवडणुकीची प्रक्रीया पूर्ण होणार असल्याची घोषणा निवडणूक आयोगाने केली आहे.